L-istorja, il-kultura u l-ambjent

Ir-reliġjon fid-diversi modi kif tiġi espressa tkompli tixħet dawl fuq l-identità tagħna l-Maltin u l-Għawdxin. Il-wirt reliġjuż mifrux fuq fil-lokalitajiet fir-Reġjun Ċentru jirrifletti bis-sħiħ din ir-realtà. L-aspett spiritwali jingħaqad ma’ dak aktar popolari u sekulari. Il-knejjes huma ċelebrazzjoni li jpaxxu l-għajnejn u s-sensi l-oħra. Ix-xogħlijiet artistiċi ta’ sbuħija, kulur, ispirazzjoni, devozzjoni u ritwali joħolqu komunikazzjoni ma’ kull min ikun qiegħed jarahom. Kull knisja hija esperjenza unika kulturali u spiritwali; tal-bniedem u d-divin; tal-elaborat u s-sempliċi. Tabilħaqq kull knisja fir-reġjun turi l-istorja tagħha stess, miktuba mill-parruċċani tagħha, mill-artisti kkummissjonati u mill-kleru li jaqdiha. Kull knisja hija kompendju tal-ħajja reliġjuża tal-lokalità kif jidher permezz tad-devozzjoni u ritwali, ta’ arti u arkitettura, ta’ tradizzjoni u innovazzjoni, u tas-sagru u l-profan. Din il-websajt tipprovdi l-pjattaforma biex virtwalment iżżur u tgħix il-wirt fil-lokalitajiet tagħna.